Partneriaeth Natur Leol

Sir Gaerfyrddin

Mae’r Bartneriaeth yn nodwedd unigol ar ein hardal ni ac ers dros 20 mlynedd mae wedi darparu’r unig gyfle lleol, mae’n debyg, i sefydliadau cadwraeth, ecolegwyr a chofnodwyr rwydweithio, rhannu profiadau, a datblygu prosiectau mewn partneriaeth. Mae'r sefydliadau cadwraeth unigol sy’n rhan o’r Bartneriaeth yn ffurfio sbectrwm eang o arbenigedd ar ystod eang o rywogaethau a chynefinoedd (gan gynnwys ein bywyd gwyllt gorau a’r lleiaf adnabyddus).

Cysylltwch â chydlynydd bioamrywiaeth Sir Gaerfyrddin i ddarganfod mwy am Bartneriaeth Natur Leol Sir Gaerfyrddin a sut y gallwch chi helpu natur yn Sir Gaerfyrddin

Mae Cynllun Gweithredu Adfer Natur Sir Gaerfyrddin yn canolbwyntio ar wytnwch ecolegol gyda chysylltedd fel thema ganolog. Mae hyn yn rhan o weledigaeth i adfer a chreu rhwydweithiau cynefinoedd sydd wedi'u cysylltu'n well yn y sir, yn ogystal â rhwydweithiau o rannu gwybodaeth er mwyn llywio gweithredu, a hynny gan ystod o gyfranogwyr. Mae amgylchedd naturiol gwydn y sir yn cyfleu’r dyhead am Sir Gaerfyrddin iach, diogel a chynaliadwy yn economaidd.

Mae Cynllun Ymateb Cenedlaethol yn cael ei ddatblygu yn seiliedig ar amcanion y cynllun cenedlaethol sy'n mynd i'r afael â'r materion sy'n gyrru'r dirywiad mewn bioamrywiaeth, ac er mwyn cefnogi adferiad:

• Ymgysylltu a chefnogi cyfranogiad a dealltwriaeth er mwyn ymgorffori bioamrywiaeth wrth wneud penderfyniadau ar bob lefel;
• Diogelu rhywogaethau a chynefinoedd sydd o'r pwys mwyaf a gwella eu rheolaeth;
• Cynyddu gwytnwch ein hamgylchedd naturiol trwy adfer cynefinoedd dirywiedig a chreu cynefinoedd;
• Mynd i'r afael â phwysau allweddol ar rywogaethau a chynefinoedd;
• Gwella ein tystiolaeth, ein dealltwriaeth a'n monitro

Bydd Partneriaid Natur Sir Gaerfyrddin yn gweithio gyda'i gilydd i nodi meysydd blaenoriaeth ar gyfer gweithredu yn Sir Gaerfyrddin sy'n adlewyrchu amcanion Cynllun Gweithredu Adfer Natur Cymru a'r cyfleoedd a nodwyd yn Natganiad Ardal y De Orllewin. Rhaid inni ystyried yr hyn y gall unrhyw bartneriaeth ei gyflawni'n rhesymol a ble mae'r heriau a'r cyfleoedd. Bydd hyn yn dylanwadu ar strwythur unrhyw gynigion, yn arwain gosod amcanion lleol realistig ac yn helpu canolbwyntio ar y mannau hynny lle mae modd cymryd y camau mwyaf effeithiol.

Mae’r Adroddiad ar Sefyllfa Byd Natur yn Sir Gaerfyrddin 2024 yn asesiad iechyd o’r sefyllfa o ran cynefinoedd a rhywogaethau Sir Gaerfyrddin, a bydd yn adnodd gwerthfawr ar gyfer cadwraeth natur ar draws y sir. Bydd yn llywio ac yn targedu darpariaeth, ac yn llinell sylfaen ar gyfer Adroddiadau ar Sefyllfa Byd Natur yn y dyfodol.

Mae’r adroddiad wedi’i lunio gan Bartneriaeth Natur Leol Sir Gaerfyrddin sy’n amlygu rôl hollbwysig Partneriaethau Natur Lleol yng Nghymru. Mae’r Adroddiad hefyd yn cydnabod yr angen i weithio gyda’n gilydd, ar draws pob sector o gymdeithas a busnes i gyflawni cymdeithas sy’n gyfoethog o ran natur ac sydd o fudd i bob un ohonom.

Gallwch lawrlwytho adroddiad cryno neu’r adroddiad llawn drwy ddilyn y ddolen hon